2009年2月28日星期六

用低溫發酵做的包包 - 麵包機 + 光波萬能煮食鍋(光波爐)




用麵包機搓了兩次叫做有薄膜



第一天搓好麵團入膠袋大約八點鐘 
(已經感覺麵團不斷發脹) 


第二天早上六點多
(感覺到佢大左小小膠袋比之前撐大小許)


第二日晚上回家未夠七點
(快要發了 24 小時)


第三天的早上六點多
(發了 35 小時)


第三日晚上六點多
(唔覺唔覺快要 47 小時)


第四天早上又大左
 (發左 59 小時)
(如我所料密實袋爆開唯有包多袋)



第四日下午三點
(已決定唔再等郁手啦)


最後變成了雞尾包同唔似樣的日式北海道包

今次又係無心做的低溫發酵, 因為前試過用低溫發酵第二次, 原意係放入雪櫃過夜, 待早上起身可入爐再配合光波爐快捷放便有新鮮的麵包食, 可是上失敗了第二次發酵了只發大一點, 未知是否本身酵母有無問題 (不過平時也用這包酵母正常做是沒有問題).... 所以再上網找一找關於低溫發酵的資料, 見到 "妃絹" 有做過低溫發酵的食譜, 但係她的低溫發酵方法是第一次發酵時用, 反正食譜寫要放三日, 所以決定一試也可配合我星期六比較有多一點時間攪攪陣.

低溫發酵的包包 - 光波萬能煮食鍋 vs 焗爐

跟紀絹的食譜做

蛋 一隻(原食譜為 25g)

蛋黃 一隻 (原食譜為 12.5g)

水 130-135g

蜜糖 10g

高筋麵粉 310g (要過篩)

奶粉 12.5g

糖 62g

酵母 一茶匙

鹽 一茶匙 (不可放左酵母那邊以免影響發酵)

牛油 35g (回至室溫, 牛油需要後下, 待搓到成型後才可以加)

原食譜是用人手搓, 我是一個大忙人當然係搵我的寶貝法寶麵包機幫下手, 將上列的材料 (牛油除外) 順序加入麵包機, 按搓麵團情程打至麵團成型約 30 分鐘, 關機再將牛油搽上麵團, 重新開機搓麵團約 30 分鐘後取出.

放入堅韌的膠袋要將袋內的空氣排出打上結封實, 多入幾個比較好. 放入雪櫃發酵三天取出. 打開膠袋後便可按照自己的需要分割成幾分做型, 再發酵至兩倍大即可入爐.

試食後覺得這做法出來的包有軟熟得黎有彈性, 已留起了一部份留待明天睇一下隔夜包包又如何.

鬆餅 - 光波萬能煮食鍋(光波爐)




跟食譜做的溫度和時間有點燶

又試下跟機的食譜先, 昨晚已經將麵團做好放雪櫃, 今早醒來馬上梳洗之後從雪櫃取出麵團, 見發大了小許. 不過出來效果不錯喎!! 鬆餅外脆內軟再配
"自家制的港式奶茶" 正! 不過溫度可以低小小改用 170 / 160 度比較好無咁易燶.

鬆餅 - 光波萬能煮食鍋

1. 自發粉 225g

2. 發粉 1 茶匙

3. 鹽

4. 糖 10g

5. 蜜糖 40g

6. 牛油 80g

7. 牛奶 80g

a. 將 1 - 3 過篩備用

b. 將 4-6 混合再加入 a, 用手指混合成麵包糠狀

c. 加入牛奶拌成麵團, 包好入雪櫃下格雪 10 分鐘.

烘盤掃上牛油, 用 2 湯匙份量的麵團做型.

烘碟 / 高架 180 度 10 分鐘轉 170 度再 15 分鐘上色, 最後掃上一層薄薄的蜜糖以光波爐餘溫焗一分鐘即可.

2009年2月27日星期五

脆皮咸豬手黎啦 - 光波萬能煮食鍋(光波爐) + 高速煲


今次跟足指示做....... 
不過又掛住上 bk 所以有小小過火

不過個皮就有部份係脆.


今次做出黎好好多.....

上次做的時候沒有跟足指示先將豬手用水煮所以咸了小小, 今次用水煮過味道剛好, 而表皮亦脆脆地, 下次真係要睇火再整, 希望可以更加脆更好食. 有網友問煮完豬手的水可唔可用作煮湯, 我唸我應該答你可以. 今早將豬手煮過的水試味, 都有肉味亦有小小咸味, 好就留作滾湯用做好再報告比大家知.

脆皮咸豬手 - 光波萬能煮食鍋 + 高速煲

急凍咸豬手一隻

1. 先將豬手解凍, 高速煲滾水後放入豬手水要過面, 加蓋再發出"唧""唧"聲後轉細火 15 分鐘, 自動排氣. (今日無時間所以手動快速排氣. 之後開大火滾 10 分鐘.

2. 取出豬手放涼及風乾 (我想要幾小時, 實際時間是不知道, 返工前放係度, 放工後回家馬上可以光)

3. 入爐前加一層蜜糖 (原包裝指引是用糖漿)

4. 低架/加高圈 - 240 度 10 分鐘反面再 10 分鐘即成.

2009年2月24日星期二

甜餐包+腸仔包+紅豆包 (中種) - 麵包機 + 光波萬能煮食鍋(光波爐)



扮衛星包


睇下入面覺得都 ok


跟手整埋腸仔同紅豆包

又身痕係度攪攪陣, 有一次見過一個講關於將直接法轉做中種的做法 blog, 一直係我想試又未有時間試的好方法. 比例是大約 70%為中種麵團 30%為主麵團.

昨晚又發揮我冒險精神去試. 一大清早就將中種部份處理放了在雪櫃等放工回家就可以入麵包機搓麵團, 睇下可唔可以用低溫發酵, 點知都係同一個問題, 只發到小小.... 結果放在已滾水上隔水焗 (不用開火) 加速發酵, 如果攪到昨晚十一點多才完成, 因為我一邊上網一邊光包包, 結果表面光到比較黑, 但又未至於燶......

今日試食了扮衛星包, 仍然軟熟, 算是成功, 不過如果時間夠應該可以再軟熟一點.

甜餐包+腸仔包+紅豆包 (中種) - 光波萬能煮食鍋

中種麵團

高筋麵粉 140g (要過篩)

糖 20g

酵母 一茶匙

鮮奶 100g

牛油 10g (已溶)

蛋一隻

主麵團

高筋麵粉 60g(要過篩)

糖 10g

牛油 10g

鹽 1g

做法 :

先將中種麵團攪勻發酵至兩倍大, 再加入主麵團搓揉成光滑麵團再進行第一次發酵 (這部份我用麵包機幫手) , 完成後取出分成幾份滾圓蓋上保鮮紙, 醒十分鐘再做型, 加入自己喜歡的餡料包好.

光波爐預熱 3 分鐘 180度焗 10 分鐘即成.

香矛豬扒 - 光波萬能煮食鍋(光波爐)



香噴噴的矛豬扒


同場加影 catjeffcat 第一次出鏡的肉手..... 

早幾日心急比光波爐 "辣" 親, 各位姊妹用光波爐要小心.... 小心..... 講起上黎當時整到只係一下小小痛, 所以無當一回事, 之後仲完澡搽了火石大師的紫雲膏搽了, 好在沒有起水泡.

之前煎過香矛豬扒阿囡話好食, 今次就試下用光波做睇下效果係點, 咁當然係成一樣咁好味啦.

香矛豬扒 - 光波萬能煮食鍋

豬扒先用刀背拍鬆

醃料 : 豉油/糖/生粉/油/香矛粉

高架 250 度 6 分鐘反面再 5 分鐘

2009年2月23日星期一

燒牛肋骨兩味 - 光波萬能煮食鍋(光波爐)



昨天係街市入面賣的凍肉的檔口買牛肋骨 (個名有個骨字實制係無骨)  $38 一大包, 所以又係度攪攪陣, 今次用牛肋骨用兩種方法醃制, 兩種味各有各特色. 我囡鐘意原味 (即無香草) 的那種, 我自己就覺得兩種都很味各有特色. 今次的分量只用了一
半大約六條 (相中有一條取出試食) , 另外不過 下次光的時候一開二比較好一點, 因為牛肋骨有部份比較大同厚身, 有部份比效細小. 如果裁切至大小相同比較方便入爐焗.

燒牛肋骨兩味 - 光波萬能煮食鍋

牛肋骨

醃原味醃料 :  豉油 / 糖 / 蠔油 / 油 / 生粉

醃香草醃料 : 豉油 / 糖 / 迷迭香 / 玉桂粉 / 小茴 / 大茴

將牛助骨分成二分, 每份用其中一種醃料醃一小時以上即成.

高架反轉用, 250 度 7 分鐘反面 3 分鐘即成.



綠豆蠔豉豆腐湯 - 春天湯水




最近買了本關醫師的湯水書, 雖然入面無圖只有文字, 但係入面所介紹的湯水有詳細解釋每款湯水的材料有什麼好處同食療功效, 入面所介紹的材料
有便宜及價錢貴, 任君選擇.

春天天氣潮濕, 大部份人都會煲粉葛之類的湯水去濕, 看了這本書之後, 發現原來有很多選擇, 我選了這個湯是家裡已經有綠豆, 蠔豉, 只欠豆腐及咸瘦肉, 只要買這兩個材料已經可以煲一個靚湯.

這個涉有清熱解毒、滋陰墜火的作用. 唔夠瞓又煙又酒喉痛都有功效.

綠豆蠔豉豆腐湯

綠豆二兩 (洗淨浸透)

蠔豉二兩 (洗淨浸透)

豆腐兩磚

咸瘦肉三兩

鹽小許

將所有材料放入已滾水中, 以中火煲至綠豆糜爛加入鹽調味即可.

2009年2月22日星期日

紙網蝦卷 - 光波萬能煮食鍋(光波爐)




今日光了這個現成在大昌買的紙網蝦卷, 都幾成功脆卜卜, 光的時候記得如果食物本身無油份或小許, 需要在光之前要搽一點油就可以有脆卜卜的效果. 加
埋泰式甜酸醬, 正!!

老公仲問我係咪用光波整, 佢都話 ok......

見蝦卷好似無咩油, 搽 d 油黎光.

高架 / 煎碟 250 度 9 分鐘反面 170 度 4 分鐘

焗雞蛋糕 - 光波萬能煮食鍋(光波爐)




今日見 BK 網友大姨媽 (mclam) 做了跟機的食譜, 這個超簡單又不同花太時間做的蛋糕, 等我都發下功做這個似雞蛋糕的蛋糕, 無錯非常鬆軟, 有一陣風的
感覺. 這個蛋糕非常易做, 要點是打發蛋白部份及混合其他材料時要輕手.

首先講一下如何打發蛋白, 第一裝鋼盤一定唔可有油及水, 第二打蛋白時分次加入糖, 完成時見到是 cream 狀及將鋼盤倒轉蛋白都要不會流出即成.

焗雞蛋糕 - 光波萬能煮食鍋

雞蛋 3 隻

自發粉 3 湯匙

糖 3 湯匙

鹽及油適量

先將蛋白及蛋黃分開, 將蛋白打發至起泡, 分 3 次加入糖及小許鹽打至倒轉容器蛋白不會跌是可.

再加入蛋黃輕手以切拌方式混合, 同樣以切拌方式加入已過篩的自發粉.

將麵糊加入已抹油的廚寶內, 將廚寶往枱面輕拍數下, 讓多餘空氣排走, 加蓋入爐.

預熱光波爐低存 200 度 12 分鐘即成.

2009年2月21日星期六

特大麥包 - 麵包機





今日整左個超大麥包, 比起平時用麵包機做的大好多, 平

時做起都係個桶一半, 而今次做的成品同個桶一樣高, 好在今次做是麥包沒有發得那麼高, 如果唔係真係發到上個蓋度咪超份量級囉.

特大麥包 - 麵包機

水+蛋 550g

麥麵粉 400g

高筋麵粉 100g

糖 50g

奶粉 50g

酵母 1.5 茶匙

kenwood  麵包機程式 (3) 按 1kg 低烘烤表面.

燒汁豬頸肉 - 光波萬能煮食鍋(光波爐)



又黎整豬頸肉, 雖然豬頸肉好肥, 好在光波爐可以迫油出黎. 今次用燒汁醃味道都不錯.... 不過今次燒到有小小燶, 因為今次我又無睇住佢黎燒, 係廚房
忙住煮菜. 本來今日想整燒鴨, 去到街市又掛住買嘢望記左買鴨..... 唯有明天先至再試啦.

燒豬頸肉 - 光波萬能煮食鍋

豬頸肉一件

醃料 : 喼汁, 糖, 燒汁醃一小時以上.

低架 250度 10 分鐘反面 6 分鐘

芝士波波 - 光波萬能煮食鍋




跟 bk chrisite 媽做的不過份量所有改變, 因為唔夠料做所以將材料加多及減小. 芝士波我成日都想做, 每次去烘焙材料店見到有預拌粉賣, 但係本住慳家精神
總覺得預拌粉係貴過自己跟食譜做的. 所以一直都無買, 而家有成功的例子跟我當然唔會放過好機會學下整.....

未食都已經好味, 焗了幾分鐘已經香氣四射, 好在囡囡去了補習, 否則出爐時囡囡一定要會問 "媽咪, 食得未呀? 好香呀"

芝士波 - 光波萬能煮食鍋 (約20個湯圓大小)

材料:

木薯粉 - 40g (原食譜係 30g) - 是泰國生粉, 可在超市買到買時請睇一睇成份只有木薯粉, 也可在泰國或印尼舖頭搵到. (我平時都用作打獻, 比起用粟粉感覺健康一點, 因粟粉有化學成份)

糯米粉 - 90g (原食譜是 100g 咁家裡只得 90g)

牛油溶液 - 2.5湯匙

卡夫芝士粉 - 40g

牛奶 - 約45ml (無用晒)


蛋 - 1隻

將木薯粉, 糯米粉及芝士粉拌勻再加入牛油溶及蛋攪勻, 最後加入牛奶慢慢加要睇情況只要材料可以黏在一起即可, 將麵糰搓成湯圓大小, 排入烘焙碟, 每個之間要有空位.

預熱的光波爐 低架/烘焙

碟 用180度焗 9 分鐘轉 170 度 8 分鐘. (原食譜為 175 度 15 分鐘)
泰國生粉就係以下我係超市買到的泰國生粉






2009年2月19日星期四

燒德國咸豬手 - 光波萬能煮食鍋(光波爐)



呢個咸豬手未買光波爐之前已經想買, 但係用焗爐又擔心會焗到太光, 一直都見到都唔會買. 買左光波爐之後就唔同講法啦...... 用光波爐做出來的食物
唔會好似焗爐只會焗到食物咁乾身. 其實我做呢個出黎又係亂做一通, 點解我會咁講係因為我無睇清楚袋上的煮法, 就攞左去光其實人家的做法是先放左滾水中煮一下才入爐. 好在都可以煮得熟, 邊邊的皮都有 d 脆. 不過唔知係老公切得厚還是因為無用水煮一下, 所以出黎比較咸, 但係囡囡就好鐘意, 食飯食到一半已經問我 "媽咪, 你幾再煮呢個呀?" 我當時登大對唔係很大眼望住囡囡, 這餐未食完就唸幾時再有得食.

燒德國咸豬手 - 光波萬能煮食鍋

德國咸豬手 (可在凍肉舖買到)

麥芽糖+醋稀釋

解凍後低架/加高圈 250 度 20 分鐘搽上已稀釋的麥芽糖再反面搽麥芽糖 15 分鐘, 在最後幾分鐘睇下表面是否已燒得夠.

2009年2月17日星期二

全麥提子包 - 麵包機 + 光波萬能煮食鍋(光波爐)


今晚好忙又光多春魚, 又光粟米石班, 而家又到全麥提子包, 無法啦..... 呢個係明天的早餐. 初初唸住淨定麥包, 不過怕囡囡唔食, 後尾加埋提子落去.
原本是跟專業的食譜做, 唔知點解我又走去改食譜, 原本麥粉係 100g , 可能因為咁啱倒多了麥粉就任得佢啦.... 我落左 150g, 根粉就改落 50g,  之後自己加提子, 

全麥提子包 - 光波萬能煮食鍋

溫水 130g
芥花仔油 15g
全麥粉 150g
高筋麵包 50g
糖 10g
酵母 3g
鹽 4g

用麵包機依次序落材料, 開機 kenwood 麵包機按程式( 8 ) 搓麵團, 完成後分 8 分滾圓後, 上面加保鮮紙淨止 10 分鐘, 將麵團壓平加入提子卷起滾至圓型, 再用光波做第二次發酵低架 60 度 10 分鐘搽蛋汁.

低架 180 度 12 分鐘即成.

粟米石班 - 光波萬能煮食鍋(光波爐)



今次係因為要用光波爐光多春魚, 所以試下光埋石班,
都係無咩特別, 光完加個粟米計就算..... 都唔係快得幾多, 不過都係貪得意試下. 未必會有下次.... 感覺要洗多樣嘢. 

粟米石班 - 光波萬能煮食鍋

石班數件

醃料 : 鹽, 酒

入爐前在表面搽上生油

高架 220 度 6 分鐘反面 4 分鐘

脆卜卜多春魚 - 光波萬煮食鍋(光波爐)



終於可以叫脆卜卜多春張, 之前整多幾次都無如理想. 今日撞彩整到, 原來係自己一直都怕燶, 所以見到開始燶就收手, 因為今晚好多嘢攪, 一邊光多春魚
又一煮粟米汁, 所以我會特別照顧多春魚, 光到六分鐘左右時聽到卜卜聲, 原來多春魚頂唔順有部份自己炸開, 見到色水都唔錯就反面. 今次都幾成功連魚頭都脆脆地, 囡囡都話 ok....

多春魚 - 光波萬能煮食鍋

多春魚

醃料 : 鹽及酒

將多春魚洗淨加入鹽及酒醃一小時以上

光波前用小許油撈一撈多春魚才光.....

高架 250 度 10 分鐘再光 4 - 5分鐘即

2009年2月16日星期一

再戰叉燒 - 光波萬能煮食鍋(光波爐)


加了麥芽糖的叉燒出爐時立立令


昨日買了梅頭肉醃好, 再做多次叉燒, 今次加了麥芽糖出
黎效都唔錯.... 出爐時光光令令, 食時同出面的叉燒味道差不多, 今次非常滿意. 不過值得一提就是如果喜歡食叉燒燶邊的話, 可以將梅頭肉分切多件會有多一些燶邊.

叉燒 - 光波萬能煮食鍋

梅頭肉一件

醃料 : 豉油, 糖, 豪油, 叉燒醬 (叉燒醬的比例要多一點)

麥芽汁料 : 麥芽糖, 醋 (用熱水座溶麥芽糖再+醋稀釋)

將梅頭肉用醃料醃一小時以上 (醃前先鬆針).

低架 200 度 10 分鐘搽上麥芽汁料反面上麥芽汁料再光 5 分鐘

2009年2月15日星期日

醃四季桔




又到左醃桔仔時候, 近幾年都有醃桔仔, 最初幾年醃了柑桔, 但後來發現其實最好係四季桔, 因為醃制後是很有藥用價值, 唔怪之好似阿 SO 咁講佢親
戚留下幾十年的桔仔, 佢話未到就黎病死係唔會沖黎飲. 

相信大家都有印象我年三十晚的運桔行動, 由運輸部總經理 - 老公負責托回家, 今年盤桔非常大棵. 上星期日剪桔仔都剪到手軟, 剪完有兩大個鋼盤咁多, 有小許豐收的感覺. 又有 d 怕個大玻璃樽會唔夠裝. 結果真係比我估中係唔夠, 而家整了兩樽. 本來兩樽一樣, 因為我得一個樽, 而醃個日又行街行到累死, 所以無去買樽, 誰知兩日都要 OT 返到去舖頭已關門大吉, 就係咁有部份桔已經唔要得. 所以另一樽唔滿有點可惜. 而家左手邊的那樽已經見到底部出了水. 過幾日會收埋佢唔理佢架啦....

阿囡成日問我幾時飲得, 我話又排等, 等你嫁人個時比你就嫁妝, 如果阿囡三十歲結婚, 咁到時應該都有接近二十啦... ... 哈哈!! 仲有果皮添.....

醃桔方法

桔用較剪剪唔好用手揀, 洗淨風乾入樽時用廚房紙抹乾

底部放一點鹽, 放一層桔又放一層鹽, 到最後一層鹽要多一點封蓋, 過幾天再將鹽向下壓, 因為當桔仔出了水時會令鹽痴起一團, 會令桔同鹽有空間就醃唔到 d 桔.

後記 : 樽桔仔最好係唔好咁快放入廚櫃, 每日都睇下桔仔出水情況, 因為桔仔頭幾日會開始出小小水, 個時會令鹽結埋係一齊, 就就會出現隙位, 我會打開蓋用湯殼壓下鹽等隙位再次被填滿. 咁就無咁易發毛.

芝麻卷+腸仔麵包機搓粉 (正常發酵 vs 低溫發酵) - 麵包機 + 光波萬能煮食鍋(光波爐)




自從囡囡學校去年十一月開始轉全日制後, 識我網友都知我為了囡囡的健康同學習, 每日都五點幾六點要起身做豆漿及早點給囡囡食. 點解要咁辛苦都係想囡囡食得好小小, 因為午餐已經是訂飯, 晚餐有時返工遲了就會比較選擇買外賣回家食, 所以我特
別注重早餐. 除了營養外點解小朋友一定要食早餐就要開腦 - 因為小朋友如果唔食早餐個人會唔清醒(以為自己仲未起身)會影響係學校的學習, 再者不食早點上課途中肚餓都會難以集中精神, 所以有小朋友的媽咪每天早上都要給小朋友食過早餐才可以安心讓小朋友上學去.

原意買麵包機是想預較時間起身有麵包食, 後來才發現做起的麵包不適宜立即進食, 要待放涼最少三十分鐘才可進食, 一度令到我放棄新鮮麵包的唸頭. 每次都是返工回家做好麵包放涼第二天早上食隔夜麵包. 除了食方包外又想有新意思就要做型麵包, 不過做型麵包相對也要花多一點時間去做.

前天上 bk 時見到有個 topic 是講新鮮麵包, 講到低溫發酵, 也有媽咪試過無問題. 咁我又發揮我的冒險精神去試一次. 大家可以做個比較左邊深色一點的是正常室溫發酵做的, 右邊淺色的是用低溫發酵做的. 已經發酵超過十四小時好明顯右邊發酵仍未夠時間, 只發大了一點. 可能是我調雪櫃的溫度要高一點才可以讓麵團發酵得更好. 下次再試下將雪櫃的溫度提高一點, 睇下出黎的效果是如何, 另外就係有可能因為麵團取出麵團仍然是很凍. 或是要試下回溫才入焗可能比較好.

詳細麵包的食譜可參照 芝麻卷 的做法.

光波爐焗 - 高架反轉 180 度焗 10 分鐘.

2009年2月13日星期五

搓包/搓麵團短片

最近很多很多 bk 網友都提起點樣人手搓包, 如果口講或睇書都唔係太清楚係點. 以前曾經睇過日清的網站有短片, 搵了幾次都搵唔到, 今日又有人提起我又再搵多次, 終於比我搵到, 如果你有興趣睇下點樣搓包就 click 下面條 link 去睇啦....

http://www.nisshin.com/life/komugiko_club/meikan/04/movie/full.html

雞翼兩味 - 光波萬能煮食鍋(光波爐)


光波雞翼今次的做法同之前的不同, 用非常簡單的方法醃, 也用左了兩種唔同的方法試. 今次用了鹽同薑蔥醃, 最初是想醃完就光波, 後尾一想試下上粉睇下
出黎會唔會似炸雞翼. 結果食起黎都係似炸過的雞翼不過唔係脫爆, 可能我沒有用油撈一撈雞翼先上粉, 所以要等光波迫到雞翼的油先至可以炸到粉, 下次要試下撈油再上粉先. 另外一個味道就係加椒鹽, 不過感覺普通一點.

雞翼兩味 - 光波萬能煮食鍋

雞翼

醃料 : 鹽, 薑, 蔥

1. 似炸 - 光波前上粟粉

2. 椒鹽 - 光波前上椒鹽

高架 250 度 8 分鐘 反面 5 鐘

2009年2月12日星期四

燒豬頸肉 - 光波萬能煮食鍋(光波爐)


豬頸肉用光波爐整真係好掂, 可以將入面的肥油迫出, d 肥油真係好多.... 反面同取出時面頭 d 油多到流出黎, 迫到出油次外內裡仍然是有肉汁唔會話
好乾晒. 今次邊邊燒到有小小似叉燒的燶邊脆脆地咁. 囡囡今日又比個叻我.

豬頸肉 - 光波萬能煮食鍋

豬頸肉一件

醃料 : 豉油, 糖, 喼汁, 叉燒醬

高架反轉用 250 度 10 分鐘反面再 6 分鐘.

2009年2月11日星期三

品品包 (香蔥火腿包) - 麵包機 + 光波萬能煮食鍋(光波爐)





大家係咪好奇怪, 平時我相入面的字會放係相底部中間位置, 為什麼會高左, 是其實係我整濃左個包面, 咁就係遮羞用..... 哈哈.... 下次用光波爐千其唔好上 bk
如果唔係就好似我咁出事架啦....

今日浦 bk 又有人問火波爐可唔可以整包, 網友火石叫我整比包仲要放埋相上去. 今次雖然有有整但係唔代表佢叫我就整, 而係我啱啱都食晒包包要再整, 所以就整出黎.... 品品包都好耐無整過, 所以揀左佢黎做.....

詳細的食譜 香蔥火腿包材料

麵包機搓麵團+發酵後取出, 醒十分鐘再整型加餡料, 再發酵三十分鐘或至 2-2.5倍大.

今次用左烘碟, 加平時蒸餸用的架 (比高架低但又比低架高) 190 度 10 分鐘就攪到好似我呢張相咁但入面未熟, 再用 170 度多 3 分鐘.... 下次用 170-180 度應該得.